Allah ke naam se jo Rehman o Raheem hai
1. Alif laam meem
2. Allah , woh zinda e javed hasti , jo nizam e qayinaat ko sambhale huey hai, haqeeqat mein uske siwa koi khuda nahin hai.
3. Usne tumpar yeh kitaab naazil ki hai, jo haqq lekar aayi hai aur un kitaabon ki tasdeeq kar rahi hai jo pehle se aayi hui thi, is se pehle woh Insano ki hidayat ke liye taurat aur injil naazil kar chuka hai.
4. Aur usne woh kasauti (criteria) utari hai (jo haqq aur baatil ka farq dikhane wali hai). Ab jo log Allah ke farameen ko qabool karne se inkar karein, unko yaqeenan sakht saza milegi. Allah be-panaah taaqat ka maalik hai aur burayi ka badla dene wala hai.
5. Zameen aur asmaan ki koi cheez Allah se posheeda nahin.
6. Wahi to hai jo tumhari Maaon ke pait mein tumhari suratein , jaisi chahta hai, banata hai. Us zabardast hikmat wale ke siwa koi aur khuda nahin hai.
7. Wahi khuda hai, jisne yeh kitaab tumpar naazil ki hai. Is kitaab mein do tarah ki aayaat hain : ek mohkamaat, jo kitaab ki asal buniyaad hain aur dusri mutashabihat (ambiguous). Jin logon ke dilon mein tedh hai, woh fitne ki talash mein hamesha mutashabihat hi ke pichey padey rehte hain aur unko maani pehnane ki koshish kiya karte hain, halaanke unka haqiqi mafhoom Allah ke siwa koi nahin jaanta. Bakhilaf iske jo log ilm mein pukhta-kaar hain, woh kehte hain ke “ hamara unpar iman hai, yeh sab hamare Rubb hi ki taraf se hain” aur sach yeh hai ke kisi cheez se saheeh sabaq sirf danishmand log hi haasil karte hain.
8. Woh Allah se dua karte rehte hain ke “ parwardigaar! Jab tu humein seedhe raste par laga chuka hai, to phir kahin hamare dilon ko kaji (crookedness) mein mubtala na kar dijiyo. Humein apne khazane faiz se rehmat ata kar ke tu hi faiyyaz e haqiqi (ata farmane wala) hai.
9. Parwardigaar! Tu yaqeenan sab logon ko ek roz jamaa karne wala hai, jiske aane mein koi shubha (shakk) nahin tu hargiz apne wadey se talne wala nahin hai”.
10. Jin logon ne kufr ka rawayya ikhtiyar kiya hai, unhein Allah ke muqable mein na unka maal kuch kaam dega, na aulad , woh dozakh ka indhan (fuel) bankar rahenge.
11. Unka anjaam waisa hi hoga, jaisa Firoun ke saathiyon aur unse pehle ke nafarmaano ka ho chuka hai ke unhon ne aayaat e ilahi ko jhutlaya, nateeja yeh hua ke Allah ne unke gunaahon par unhein pakad liya aur haqq yeh hai ke Allah sakht saza dene wala hai.
12. Pas (aey Muhammad) ! jin logon ne tumhari dawat ko qabool karne se inkar kardiya hai, unse kehdo ke qareeb hai woh waqt , jab tum magloob ho jaaoge aur jahannum ki taraf haanke jaaoge aur jahannum bada hi bura thikana hai.
13. Tumhare liye un do giroohon mein ek nishan e ibrat tha, jo (badr mein) ek dusre se nabard aazma (encountered) huey, ek giroh Allah ki raah mein ladh raha tha aur dusra giroh kafir tha, dekhne wale ba-chashm e sar dekh rahe thay ke kafir giroh momin giroh se do chandh (twice )hai magar (nateeje ne saabit kardiya ke) Allah apni fatah o nusrat se jisko chahta hai madad deta hai. Deedha e beena (eyes to see) rakhne walon ke liye is mein bada sabaq posheeda hai.
14. Logon ke liye margoobaat e nafs auratein, aulad, soney chandi ke dhair, cheeda ghodey (horses) maweshi aur zarayi zameenein badi khush-aand bana di gayi hain. Magar yeh sab duniya ki chandh roza zindagi ke samaan hain , haqeeqat mein jo behtar thikana hai woh to Allah ke paas hai.
15. Kaho: main tumhein bataoon ke inse zyada acchi cheez kya hai? Jo log taqwa ki rawish ikhtiyar karein, unke liye unke Rubb ke paas baagh hain, jinke nichey nehrein behti hongi, wahan unhein hameshgi ki zindagi haasil hogi, pakeeza biwiyan unki rafeeq (companions) hongi aur Allah ki raza se woh sarfaraz honge. Allah apne bandon ke rawayye par gehri nazar rakhta hai.
16. Yeh woh log hain, jo kehte hain ke “ maalik ! hum iman laye, hamari khataon se darguzar farma aur humein aatish e dozakh se bacha le”.
17. Yeh log sabr karne wale hain, raastbaaz hain, farmabardaar aur faiyyaz hain aur raat ki aaakhri ghadiyon mein Allah se magfirat ki duaein maanga karte hain.
18. Allah ne khud shahadat di hai ke uske siwa koi khuda nahin hai, aur (yahi shahadat) Farishton aur sab ehle ilm ne bhi di hai, woh insaaf par qayam hai, us zabardast hakeem ke siwa fil waqeh koi khuda nahin hai.
19. Allah ke nazdeek deen sirf Islam hai, is deen se hatkar jo mukhtalif tareeqe un logon ne ikhtiyar kiye jinhein kitaab di gayi thi, unke is tarz-e-amal ki koi wajah iske siwa na thi ke unhon ne ilm aa jaane ke baad aapas mein ek dusre par zyadati karne ke liye aisa kiya. Aur jo koi Allah ke ehkam o hidayaat ki itaat se inkar karde, Allah ko us se hisaab lete kuch dair nahin lagti hai.
20. Ab agar yeh log tumse jhaghda karein, to inse kaho : “ maine aur mere pairawon (followers) ne to Allah ke aage sar tasleem kham kardiya hai”. Phir ehle kitaab aur gair ehle kitaab dono se pucho: “ kya tumne bhi uski itaat o bandagi qabool ki?” Agar ki to woh raah e raast paa gaye, aur agar is se mooh moda to tumpar sirf paigaam pahuncha dene ki zimmedari thi, aage Allah khud apne bandon ke maamlaat dekhne wala hai.
21. Jo log Allah ke ehkam o hidayaat ko maanne se inkar karte hain aur uske paigambaron ko na-haqq qatal karte hain aur aise logon ki jaan ke darpe ho jaate hain jo khalq e khuda mein adal o raasti ka hukm dene ke liye uthein, unko dardnaak saza ki khush-khabri suna do.
22. Yeh woh log hain jinke aamaal duniya aur aakhirat dono mein zaya ho gaye, aur inka madadgaar koi nahin hai.
23. Tumne dekha nahin ke jin logon ko kitaab ke ilm mein se kuch hissa mila hai, unka haal kya hai? Unhein jab kitaab e ilahi ki taraf bulaya jata hai taa-ke woh unke darmiyan faisla kare, to unmein se ek fareeq is se pehlu-tahi karta hai aur is faisle ki taraf aane se mooh pher jata hai.
24. Unka yeh tarz-e-amal is wajah se hai ke woh kehte hain “ aatish e dozakh to humein mass (choo) tak na karegi aur agar dozakh ki saza humko milegi bhi to bas chandh roz”. Unke khud saakhta aqeedon ne unko apne deen ke maamle mein badi galat fehmiyon mein daal rakkha hai.
25. Magar kya banegi unpar jab hum unhein us roz jamaa karenge jiska aana yaqeeni hai? Us roz har shaks ko uski kamayi ka badla poora poora de diya jayega aur kisi par zulm na hoga.
26. Kaho! Khudaya! Mulk ke maalik! Tu jise chahe, hukumat de aur jis se chahe cheen le, jise chahe izzat bakshey aur jisko chahe zillat de. Bhalayi tere ikhtiyar mein hai. Beshak tu har cheez par qaadir hai.
27. Raat ko din mein pirota hua le aata hai aur din ko raat mein, jaandaar mein se be-jaan ko nikalta hai aur be-jaan mein se jaandaar ko, aur jise chahta hai be-hisaab rizq deta hai.
28. Momineen ehle iman ko chodh kar kafiron ko apna rafeeq aur dost hargiz na banayein, jo aisa karega uska Allah se koi taaluq nahin, haan yeh maaf hai ke tum unke zulm se bachne ke liye bazahir aisa tarz-e-amal ikhtiyar kar jao, magar Allah tumhein apne aap se darata hai aur tumhein usi ki taraf palat kar jana hai.
29. (Aey Nabi)! Logon ko khabardaar kardo ke tumhare dilon mein jo kuch hai, usey khwa tum chupao ya zaahir karo, Allah bahar haal usey jaanta hai. Zameen o asmaan ki koi cheez uske ilm se bahar nahin hai aur uska iqtedar har cheez par haawi hai.
30. Woh din aane wala hai, jab har nafs apne kiye ka phal haazir payega khwa usne bhalayi ki ho ya burayi. Us roz aadmi yeh tamanna karega ke kaash abhi yeh din us se bahut door hota! Allah tumhein apne aap se darata hai aur woh apne bandon ka nihayat khair khwa hai.
31. (Aey Nabi)! Logon se kehdo ke “agar tum haqeeqat mein Allah se muhabbat rakhte ho , to meri pairwi ikhtiyaar karo, Allah tumse muhabbat karega aur tumhari khataon se darguzar farmayega, woh bada maaf karne wala aur Raheem hai”
32. Unse kaho ke “Allah aur Rasool ki itaat qabool karlo” phir agar woh tumhari dawat qabool na karein, to yaqeenan yeh mumkin nahin hai ke Allah aise logon se muhabbat kare, jo uski aur uske Rasool ki itaat se inkar karte hon.
33. Allah ne Adam aur Nooh aur aale- Ibrahim aur aal-e-Imran ko tamaam duniya walon par tarjeeh dekar (apni risalat ke liye) muntakhab kiya tha.
34. Yeh ek silsile ke log thay, jo ek dusre ki nasal se paida huey thay, Allah sabkuch sunta aur jaanta hai.
35. (Woh us waqt sun raha tha) jab Imran ki aurat keh rahi thi ke, “mere parwardigaar! Main is bacche ko jo mere pait mein hai teri nazar karti hoon, woh tere hi kaam ke liye waqf hoga, meri is peshkash ko qabool farma, tu sunne aur jaanne wala hai.”
36. Phir jab woh bacchi uske haan paida hui to usne kaha “Maalik! Mere haan to ladki paida ho gayi hai, halaanke jo kuch usne janaa (delivered) tha, Allah ko iski khabar thi aur ladka ladki ki tarah nahin hota. Khair, maine uska naam Maryam rakh diya hai aur main usey aur uski aainda nasal ko shaytan mardood ke fitne se teri panaah mein deti hoon”.
37. Aakhir e kaar uske Rubb ne us ladki ko ba-khushi qabool farma liya , usey badi acchi ladki banakar uthaya aur Zakariya ko uska sarparast bana diya. Zakariya jab kabhi uske paas mehraab (sanctuary) mein jata to uske paas kuch na kuch khane peene ka samaan paata. Puchta Maryam! Yeh tere paas kahan se aaya? Woh jawab deti Allah ke paas se aaya hai, Allah jise chahta hai be-hisaab deta hai.
38. Yeh haal dekh kar Zakariya ne apne Rubb ko pukara “parwardigaar! Apni qudrat se mujhe neik aulad ata kar, tu hi dua sunne wala hai”.
39. Jawab mein Farishton ne awaaz di, jab ke woh mehraab mein khada namaz padh raha tha ke “Allah tujhey Yahya ki khush-khabri deta hai , woh Allah ki taraf se ek farmaan ki tasdeeq karne wala bankar aayega, usmein sardari o buzurgi ki shaan hogi kamal darje ka zaabit (utterly chaste) hoga, nabuwat se sarfaraz hoga aur saliheen mein shumaar kiya jayega”.
40. Zakariya ne kaha,“Parwardigaar! Bhala mere haan ladka kahan se hoga, main to boodha ho chuka hoon aur meri biwi baanjh hai, “ jawab mila, aisa hi hoga, Allah jo chahta hai karta hai”.
41. Arz kiya “Maalik! Phir koi nishani mere liye muqarrar farma de”. Kaha, Nishani yeh hai ke tum teen din tak logon se ishaare ke siwa koi baat-chit na karoge (ya na kar sakoge), is dauraan mein apne Rubb ko bahut yaad karna aur subah o sham uski tasbeeh karte rehna.”
42. Phir woh waqt aaya jab Maryan se Farishton ne aakar kaha, “ Aey Maryam! Allah ne tujhey barguzeeda kiya aur pakeezgi ata ki aur tamaam duniya ki auraton par tujhko tarjeeh dekar apni khidmat ke liye chun liya.
43. Aey Maryam! Apne Rubb ki tabey farmaan bankar reh, uske aage sar ba-sajood ho, aur jo banday uske huzoor jhukne wale hain unke saath tu bhi jhuk jaa”.
44. (Aey Muhammad)! Yeh gaib ki khabrein hain jo hum tumko wahee ke zariye se bata rahe hain, warna tum us waqt wahan maujood na thay jab haykal ke khadim yeh faisla karne ke liye ke Mayram ka sarparast kaun ho apne apne qalam phenk rahe thay, aur na tum us waqt haazir thay jab unke darmiyaan jhagda barpa tha.
45. Aur jab Farishton ne kaha, “Aey Maryam! Allah tujhey apne ek farmaan ki khush-khabri deta hai, uska naam Maseeh Isa Ibn e Maryam hoga, duniya aur aakhirat mein muazzaz (highly honoured) hoga, Allah ke muqarrab bandon mein shumaar kiya jayega.
46. Logon se gehware(cradle) mein bhi kalaam(baat) karega aur badi umar ko pahunch kar bhi, aur woh ek mard e saleeh hoga”.
47. Yeh sunkar Maryam boli, “parwardigaar! Mere haan bacha kahan se hoga, muhjey to kisi shaks ne haath tak nahin lagaya” jawab mila, “aisa hi hoga, Allah jo chahta hai paida karta hai. Woh jab kisi kaam ke karne ka faisla farmata hai to bas kehta hai ke hoja aur woh ho jata hai”.
48. (Farishton ne phir silsila e kalaam mein kaha) “Aur Allah usey kitaab aur hikmat ki taleem dega, Taurat aur Injil ka ilm sikhayega.
49. Aur bani Israel ki taraf apna Rasool muqarrar karega” (aur jab woh bahaisiyat e Rasool bani Israel ke paas aaya to usne kaha) “ main tumhare Rubb ki taraf se tumhare paas nishani lekar aaya hoon, main tumhare saamne mitti se parindey ki surat mein ek mujassama banata hoon aur usmein phoonk maarta hoon, woh Allah ke hukm se parinda ban jata hai, main Allah ke hukm se madar zaadh (by birth) andhey aur kodi (leper) ko accha karta hoon aur murde ko zinda karta hoon, main tumhein batata hoon ke tum kya khate ho aur kya apne gharon mein zakheera(store) karke rakhte ho. Is mein tumhare liye kafi nishani hai agar tum iman laane wale ho.
50. Aur main us taleem o hidayat ki tasdeeq karne wala bankar aaya hoon jo Taurat mein se is waqt mere zamane mein maujood hai, aur is liye aaya hoon ke tumhare liye baaz un cheezon ko halal kardoon jo tumpar haraam kardi gayi hain. Dekho main tumhare Rubb ki taraf se tumhare paas nishani lekar aaya hoon , lihaza Allah se daro aur meri itaat karo.
51. Allah mera Rubb hai aur tumhara Rubb bhi, lihaza tum usi ki bandagi ikhtiyar karo, yahi seedha raasta hai.
52. Jab Isa ne mehsoos kiya ke bani Israel kufr o inkar par aamaada hain to usne kaha “kaun Allah ki raah mein mera madadgaar hota hai?” Hawariyon (desciples) ne jawab diya, “hum Allah ke madadgaar hain, hum Allah par iman laye, gawah raho ke hum muslim (Allah ke aage sar itaat jhuka dene wale) hain.
53. Maalik! Jo farmaan tu ne naazil kiya hai humne usey maan liya aur Rasool ki pairwi qabool ki, hamara naam gawahi dene walon mein likh le”.
54. Phir bani Israel (Maseeh ke khilaf) khufiya tadbeerein karne lage, jawab mein Allah ne bhi apni khufiya tadbeer ki aur aisi tadbeeron mein Allah sabse badh kar hai.
55. (Woh Allah ki khufiya tadbeer hi thi) jab usne kaha, “ aey Isa! Ab main tujhey wapas le lunga aur tujhko apni taraf utha lunga aur jinhon ne tera inkar kiya unse (yani inki maiyat se aur unke gandey maahol mein unke saath rehne se) tujhey paak kardunga aur teri pairwi karne walon ko qayamat tak un logon par baaladast rakhunga jinhon ne tera inkar kiya hai. Phir tum sabko aakhir mere paas aana hai, us waqt main un baaton ka faisla kardunga jinmein tumhare darmiyan ikhtilaf hua hai.
56. Jin logon ne kufr o inkar ki rawish ikhtiyar ki hai unhein duniya aur aakhirat dono mein sakht saza dunga aur woh koi madadgaar na payenge.
57. Aur jinhon ne iman aur neik amal ka rawayya ikhtiyar kiya hai unhein unke ajar poore poore de diye jayenge, aur khoob jaan le ke zalimon se Allah hargiz muhabbat nahin karta”.
58. Yeh aayaat aur hikmat se labrez tazkeere hain jo hum tumhein suna rahe hain.
59. Allah ke nazdeek Isa ki misaal Adam ki si hai ke Allah ne usey mitti se paida kiya aur hukm diya ke hoja aur woh hogaya.
60. Yeh asal haqeeqat hai jo tumhare Rubb ki tarf se batayi jaa rahi hai aur tum un logon mein shamil na ho jo is mein shakk karte hain.
61. Yeh ilm aa jaane ke baad ab koi us maamle mein tumse jhagda kare to (aey Muhammad)! Us se kaho, “ aao hum aur tum khud bhi aa jayein aur apne apne baal bacchon ko bhi le aayein aur khuda se dua karein ke jo jhuta ho uspar khuda ki laanat ho”.
62. Yeh bilkul saheeh waqiyaat hain, aur haqeeqat yeh hai ke Allah ke siwa koi khuda-wand nahin hai, aur woh Allah hi ki hasti hai jiski taaqat sabse baala aur jiski hikmat nizaam-e-aalam mein kaar farma hai.
63. Pas agar yeh log (is shart par muqable mein aane se) mooh moadein to (unka mufsid hona saaf khul jayega) aur Allah to mufsidon ke haal se waqif hi hai.
64. Kaho, “aey ehle kitaab! Aao ek aisi baat ki taraf jo hamare aur tumhare darmiyan yaksaan hai , yeh ke hum Allah ke siwa kisi ki bandagi na karein, uske saath kisi ko shareek na thehrayein , aur hum mein se koi Allah ke siwa kisi ko apna Rubb na bana le”. Is dawat ko qabool karne se agar woh mooh moadein to saaf kehdo ke gawah raho, hum to Muslim (sirf khuda ki bandagi o itaat karne wale) hain.
65. Aey ehle kitaab! Tum Ibrahim ke baare mein humse kyun jhagda karte ho? Taurat aur Injil to Ibrahim ke baad hi naazil hui hai, phir kya tum itni baat bhi nahin samajhte.
66. Tum log jin cheezon ka ilm rakhte ho unmein to khoob behasein (arguments) kar chuke, ab un maamlaat mein kyun behas karne chale ho jinka tumhare paas kuch bhi ilm nahin .Allah jaanta hai , tum nahin jaante.
67. Ibrahim na yahudi tha na Isayi , balke woh ek Muslim, yaksu tha aur woh hargiz Mushirkon mein se na tha.
68. Ibrahim se nisbat rakhne ka sabse zyada haqq agar kisi ko pahunchta hai to un logon ko pahunchta hai jinhon ne uski pairwi ki aur ab yeh Nabi aur uske maanne wale is nisbat ke zyada haqqdar hain. Allah sirf unhi ka haami o madadgaar hai jo iman rakhte hon.
69. (Aey Iman laane walon) ehle kitaab mein se ek giroh chahta hai ke kisi tarah tumhein raah e raast se hata de, halaanke dar haqeeqat woh apne siwa kisi ko gumraahi mein nahin daal rahe hain magar unhein iska shaoor nahin hai.
70. Aey ehle kitaab! Kyun Allah ki aayaat ka inkar karte ho halaanke tum khud inka mushahida kar rahe ho?
71. Aey ehle kitaab! Kyun haqq ko baatil ka rang chadha kar mushtaba (confound ) banate ho? Kyun jaante boojhte haqq ko jhutlate ho?
72. Ehle kitaab mein se ek giroh kehta hai ke is Nabi ke maanne walon par jo kuch naazil hua hai uspar subah iman lao aur sham ko is se inkar kardo, shayad is tarkeeb se yeh log apne iman se phir jayein.
73. Neiz yeh log aapas mein kehte hain ke apne mazhab wale ke siwa kisi ki baat na maano. Aey Nabi! Inse kehdo ke, “asal mein hidayat to Allah ki hidayat hai aur yeh usi ki dain hai ke kisi ko wahi kuch de diya jaaye jo kabhi tumko diya gaya tha, ya yeh ke dusron ko tumhare Rubb ke huzoor pesh karne ke liye tumhare khilaf koi hujjat mil jaaye. “(Aey Nabi)! inse kaho ke, “ fazl o sharf Allah ke ikhtiyar mein hai, jise chahe ata farmaye. Woh waseeh ul nazar hai aur sab kuch jaanta hai.
74. Apni rehmat ke liye jisko chahta hai makhsoos karleta hai aur uska fazl bahut bada hai.”
75. Ehle kitaab mein koi to aisa hai ke agar tum uske aitamaad (bharose) par maal o daulat ka ek dhair bhi dedo to woh tumhara maal tumhein ada kardega, aur kisi ka haal yeh hai ke agar tum ek dinar ke maamle mein bhi uspar bharosa karo to woh ada na karega, illa yeh ke tum uske sar par sawar ho jao, unki is akhlaqi haalat ka sabab yeh hai ke woh kehte hain, “ummiyon (gair yahudi logon) ke maamle mein humpar koi muwazkhza nahin hai” aur yeh baat woh mehaz jhoot ghadh kar Allah ki taraf mansoob karte hai, halaanke unhein maloom hai ke Allah ne aisi koi baat nahin farmayi hai.(Aakhir kyun unse baaz purs na hogi?)
76. Jo bhi apne ahad ko poora karega aur burayi se bachkar rahega woh Allah ka mehboob banega, kyunke parheizgaar log Allah ko pasand hain.
77. Rahe woh log jo Allah ke ahad aur apne qasamo ko thodi keemat par bech daalte hain, to unke liye aakhirat mein koi hissa nahin, Allah qayamat ke roz na unse baat karega na unki taraf dekhega aur na unhein paak karega, balke unke liye to sakht dardnaak saza hai.
78. Unmein kuch log aise hain jo kitaab padhte huey is tarah zubaan ka ulat pher karte hain ke tum samjho jo kuch woh padh rahe hain woh kitaab hi ki ibarat (part/text) hai, halaanke woh kitaab ki ibarat nahin hoti. Woh kehte hain ke yeh jo kuch hum padh rahe hain yeh khuda ki taraf se hai, halaanke woh khuda ki taraf se nahin hota. Woh jaan boojh kar jhoot baat Allah ki taraf mansoob kardete hain.
79. Kisi Insan ka yeh kaam nahin hai ke Allah to usko kitaab aur hukm aur nabuwat ata farmaye aur woh logon se kahey ke Allah ke bajaye tum mere banday ban jao. Woh to yahi kahega ke sacche Rabbani bano jaisa ke is kitaab ki taleem ka taqaza hai jise tum padhte aur padhate ho.
80. Woh tumse hargiz yeh na kahega ke Farishton ko ya paigambaron ko apna Rubb bana lo, kya yeh mumkin hai ke ek Nabi tumhein kufr ka hukm de jab ke tum Muslim ho?
81. Yaad karo , Allah ne paigambaron se ahad liya tha ke, “aaj humne tumhein kitaab aur hikmat o Danish se Nawaza hai, kal agar koi dusra Rasool tumhare paas usi taleem ki tasdeeq karta hua aaye jo pehle se tumhare paas maujood hai, to tumko uspar iman lana hoga aur uski madad karni hogi”. Yeh irshad farma kar Allah ne pucha, “kya tum iska iqrar karte ho aur ispar meri taraf se ahad ki bhaari zimmedari uthate ho?” Unhon ne kaha haan hum iqrar karte hain, Allah ne farmaya, “accha to gawah raho aur main bhi tumhare saath gawah hoon.
82. Iske baad jo apne ahad se phir jaaye wahi faasiq hai”.
83. Ab kya yeh log Allah ki itaat ka tareeqa (deen Allah) chodh kar koi aur tareeqa chahte hain? Halaanke asmaan o zameen ki saari cheezein char o nachaar (willingly or un willingly) Allah hi ki taabe farmaan (Muslim) hain aur usi ki taraf sabko palatna hai?
84. (Aey Nabi)! Kaho ke “ hum Allah ko maante hain, us taleem ko maante hain jo humpar naazil ki gayi hai, un taleemat ko bhi maante hain jo Ibrahim, Ismael, Ishaq, Yaqub aur aulad e Yaqub par naazil hui thi aur un hidayaat par bhi iman rakhte hain jo Moosa aur Isa aur dusre paigambaron ko unke Rubb ki taraf se di gayi. Hum inke darmiyan farq nahin karte aur hum Allah ke taabe farmaan (Muslim) hain” .
85. Is farmabardaari (Islam) ke siwa jo shaks koi aur tareeqa ikhtiyar karna chahe uska woh tareeqa hargiz qabool na kiya jayega aur aakhirat mein woh nakaam o na-murad rahega.
86. Kaise ho sakta hai ke Allah un logon ko hidayat bakshe jinhon ne niyamat e iman paa lene ke baad phir kufr ikhtiyar kiya halaanke woh khud is baat par gawahi de chuke hain ke yeh Rasool haqq par hai aur inke paas roshan nishaniyan bhi aa chuki hain, Allah zalimon ko to hidayat nahin diya karta.
87. Unke zulm ka saheeh badla yahi hai ke unpar Allah aur Farishton aur tamaam Insano ki phitkar hai.
88. Isi haalat mein woh hamesha rahenge, na unki saza mein takhfif (kami) hogi aur na unhein mohlat di jayegi.
89. Albatta woh log bach jayenge jo iske baad tauba karke apne tarz-e-amal ki islaah karlein, Allah bakhsne wala aur reham farmane wala hai.
90. Magar jin logon ne iman laane ke baad kufr ikhtiyar kiya phir apne kufr mein badhte chale gaye unki tauba bhi qabool na hogi, aise log to pakke gumraah hain.
91. Yaqeen rakkho, jin logon ne kufr ikhtiyar kiya aur kufr hi ki haalat mein jaan di unmein se koi agar apne aap ko saza se bachane ke liye rooh-e-zameen bhar kar bhi sona (gold) fidye (expiation) mein de to usey qabool na kiya jayege, aise logon ke liye dardnaak saza tayyar hai aur woh apna koi madadgaar na payenge.
92. Tum neki ko nahin pahunch sakte jab tak ke apni woh cheezein (khuda ki raah mein) kharch na karo jinhein tum azeez rakthe to, aur jo kuch tum kharch karoge Allah us se be khabar na hoga.
93. Khane ki yeh saari cheezein (jo shariyat e Muhammadi mein halal hain) bani Israel ke liye bhi halal thi, albatta baaz chezein aisi thi jinhein Tourat ke naazil kiye jaane se pehle Israel (Yakub) ne khud apne upar haraam kar liya tha. Unse kaho, agar tum (apne aitraaz mein) sacche ho to lao Taurat aur pesh karo uski koi ibarat.
94. Iske baad bhi jo log apni jhooti ghadi hui baatein Allah ki taraf mansoob karte rahein wahi dar haqeeqat zalim hain.
95. Kaho, Allah ne jo kuch farmaya hai sach farmaya hai. Tumko yaksu hokar Ibrahim ke tareeqe ki pairwi karni chahiye, aur Ibrahim shirk karne walon mein se na tha.
96. Beshak sabse pehli ibaadat-gaah jo Insano ke liye tameer hui woh wahi hai jo Makkah mein waqeh hai, usko khair o barakat di gayi thi aur tamaam jahaan walon ke liye markaz e hidayat banaya gaya tha.
97. Ismein khuli hui nishaniyan hain, Ibrahim ka muqaam e ibaadat hai, aur iska haal yeh hai ke jo is mein daakhil hua mamoon(secure) ho gaya. Logon par Allah ka yeh haqq hai ke jo is ghar tak pahuchne ki istitaat rakhta ho woh iska hajj kare, aur jo koi is hukm ki pairwi se inkar kare to usey maloom ho jana chahiye ke Allah tamaam duniya walon se be-niyaz hai.
98. Kaho, aey ehle kitaab! Tum kyun Allah ki baatein maanne se inkar karte ho? Jo harkatein tum kar rahe ho Allah sab kuch dekh raha hai.
99. Kaho, aey ehle kitaab! yeh tumhari kya rawish hai ke jo Allah ki baat maanta hai usey bhi tum Allah ke raaste se roakte ho aur chahte ho ke woh tedhi raah chale, halaanke tum khud (iske raah e raast hone par) gawah ho. Tumhari harkaton se Allah gaafil nahin hai.
100. Aey logon jo iman laye ho, agar tumne in ehle kitaab mein se ek giroh ki baat maani to yeh tumhein iman se phir kufr ki taraf pher le jayenge.
101. Tumhare liye kufr ki taraf jaane ka ab kya mauqa baki hai jabke tumko Allah ki aayaat sunayi jaa rahi hain aur tumhare darmiyan uska Rasool maujood hai? Jo Allah ka daaman mazbooti ke saath thaamega woh zaroor raah e raast payega.
102. Aey logon jo iman laye ho, Allah se daro jaisa ke us se darne ka haqq hai, tumko maut na aaye magar is haal mein ke tum Muslim ho.
103. Sab milkar Allah ki rassi ko mazboot pakad lo aur tafraqe (divide) mein na pado. Allah ke us ehsan ko yaad rakkho jo usne tumpar kiya hai, tum ek dusre ke dusman thay, usne tumhare dil joad diye aur uske fazl o karam se tum bhai bhai ban gaye. Tum aag se bhare huey ek gadhe (pit) ke kinare khade thay, Allah ne tumko us se bacha liya, is tarah Allah apni nishaniyan tumhare saamne roshan karta hai shayad ke in alamaton se tumhein apni falaah ka seedha raasta nazar aa jaaye.
104. Tum mein kuch log to aise zaroor hi rehne chahiye jo neki ki taraf bulayein, bhalayi ka hukm dein, aur burayion se roakte rahein, jo log yeh kaam karenge wahi falaah payenge.
105. Kahin tum un logon ki tarah na ho jana jo firqon mein batt gaye aur khuli khuli wazeh hidayaat paane ke baad phir ikhtilafaat mein mubtala huey. Jinhon ne yeh rawish ikhtiyar ki woh us roz sakht saza payenge.
106. Jabke kuch log surkhru (bright) honge aur kuch ka mooh kala hoga, jinka mooh kala hoga (unse kaha jayega ke) niyamat e iman paane ke baad bhi tumne kafirana rawayya ikhtiyar kiya? Accha to ab is kufraan e niyamat ke siley mein azaab ka maza chakkho.
107. Rahe woh log jinke chehre roshan honge to unko Allah ke daaman e rehmat mein jagah milegi aur hamesha woh isi haalat mein rahenge.
108. Yeh Allah ke irshadaat hain jo hum tumhein theek theek suna rahe hain kyunke Allah duniya walon par zulm karne ka koi irada nahin rakhta.
109. Zameen o asmaan ki sari cheezon ka maalik Allah hai aur saare maamlaat Allah hi ke huzoor pesh hote hain.
110. Ab duniya mein woh behtareen giroh tum ho jise Insano ki hidayat o islaah ke liye maidan mein laya gaya hai, tum neki ka hukm dete ho, badi (burayi) se roakte ho aur Allah par iman rakhte ho. Yeh ehle kitaab iman latey to inhi ke haqq mein behtar tha, agarchey inmein kuch log imandaar bhi paye jaate hain magar inke beshtar afraad nafarmaan hain.
111. Yeh tumhara kuch bigaad nahin sakte, zyada se zyada bas kuch sataa sakte hain, agar yeh tumse ladenge to muqable mein peeth dikhyenge, phir aise bebas honge ke kahin se inko madad na milegi.
112. Yeh jahan bhi paye gaye inpar zillat ki maar hi padi, kahin Allah ke zimme ya Insano ke zimme mein panaah mil gayi to yeh aur baat hai, yeh Allah ke gazab mein ghir chuke hain, inpar mohtaji o magloobi musallat kardi gayi hai aur yeh sabkuch sirf is wajah se hua hai ke yeh Allah ki aayaat se kufr karte rahe aur inhon ne paigambaron ko na-haqq qatal kiya. Yeh inki nafarmaniyon aur zyadatiyon ka anjam hai.
113. Magar saare ehle kitaab yaksan nahin hain, inmein kuch log aise bhi hain jo raah e raast par qayam hain, raaton ko Allah ki aayaat padhte hain aur uske aage sajda reiz hote hain.
114. Allah aur roz e aakhirt par iman rakhte hain, neki ka hukm dete hain, buraiyon se roakte hain aur bhalayi ke kaamon mein sargarm rehte hain, yeh saleh log hain.
115. Aur jo neki bhi yeh karenge uski na-qadari na ki jayegi, Allah parheizgaar logon ko khoob jaanta hai.
116. Rahe woh log jinhon ne kufr ka rawayya ikhtiyar kiya to Allah ke muqable mein unko na unka maal kuch kaam dega na aulad, woh to aag mein jaane wale log hain aur aag hi mein hamesha rahenge.
117. Jo kuch woh apni is duniya ki zindagi mein kharch kar rahe hain uski misaal us hawa ki si hai jismein pala ho (accompanied with frost) aur woh un logon ki kheti par chale jinhon ne apne upar aap zulm kiya hai aur usey barbaad karke rakhde, Allah ne inpar zulm nahin kiya, darhaqeeqat yeh khud apne upar zulm kar rahe hain.
118. Aey logon jo iman laye ho, apni jamaat ke logon ke siwa dusron ko apna raazdaar na banao, woh tumhari kharabi ke kisi mauqe se faiyda uthane mein nahin chukte, tumhein jis cheez se nuqsan pahunche wahi unko mehboob hai, unke dil ka bugz (hatred) unke mooh se nikla padhta hai aur jo kuch woh apne seeno mein chupaye huey hain woh is se shadeed-tar hai. Humne tumhein saaf saaf hidayaat de di hain, agar tum aqal rakhte ho (to unse taaluq rakhne mein ehtiyat bartoge).
119. Tum unse muhabbat rakhte ho magar woh tumse muhabbat nahin rakhte, halaanke tum tamaam kutoob e asmaani ko maante ho. Jab woh tumse milte hain to kehte hain ke humne bhi (tumhare Rasool aur tumhari kitaab ko) maan liya hai, magar jab juda hote hain to tumhare khilaf unke gaiz o gazab ka yeh haal hota hai ke apni ungliyan chabane lagte hain. Unse kehdo ke apne gusse mein aap jal maro, Allah dilon ke chupey huey raaz tak jaanta hai.
120. Tumhara bhala hota to unko bura maloom hota hai, aur tumpar koi museebat aati hai to yeh khush hote hain, magar inki koi tadbeer tumhare khilaf kaargar nahin ho sakti basharth yeh ke tum sabr se kaam lo aur Allah se darr kar kaam karte raho. Jo kuch yeh kar rahe hain Allah uspar haawi hai.
121. (Aey paigambar! Musalmano ke saamne us mauqe ka zikr karo) jab tum subah sawere apne ghar se nikle thay aur (Uhud ke maidan mein) musalmaano ko jung ke liye ja-baja mamoor (placed the believers in battle arrays) kar rahe thay , Allah saari baatein sunta hai aur woh nihayat bakhabar hai.
122. Yaad karo jab tum mein se do giroh buzdili dikhane par aamaada ho gaye thay, halaanke Allah unki madad par maujood tha aur mominon ko Allah hi par bharosa rakhna chahiye.
123. Aakhir is se pehle jung e badr mein Allah tumhari madad kar chuka tha , halaanke us waqt tum bahut kamzoar thay, lihaza tumko chahiye ke Allah ki nashukri se bacho, umeed hai ke ab tum shukarguzar banoge.
124. Yaad karo jab tum momino se keh rahe thay, “ kya tumhare liye yeh baat kafi nahin ke Allah teen hazaar Farishte utar kar tumhari madad kare?”
125. Beshak, Agar tum sabr karo aur khuda se darte huey kaam karo to jis aan dushman tumhare upar chadh kar aayenge usi aan tumhara Rubb (teen hazaar nahin) paanch hazaar saahib e nishan farishton se tumhari madad karega.
126. Yeh baat Allah ne tumhein is liye bata di hai ke tum khush ho jao aur tumhare dil mutmaeen ho jayein, fatah o nusrat jo kuch bhi hai Allah ki taraf se hai jo badi quwwat wala aur dana o beena hai (the All-Mighty, the All-Wise).
127. (Aur yeh madad woh tumhein is liye dega) taa-ke kufr ki raah chalne walon ka ek bazu kaat de, ya unko aisi zaleel shikast de ke woh na-muradi ke saath paspan ho jayein.
128. (Aey paigambar) faisle ke ikhtiyaraat mein tumhara koi hissa nahin, Allah ko ikhtiyar hai chahe unhein maaf kare chahe saza de, kyunke woh zalim hain.
129. Zameen aur asmaano mein jo kuch hai uska Maalik Allah hai, jisko chahe baksh de aur jisko chahe azaab de, woh maaf karne wala aur raheem hai.
130. Aey logon jo iman laye ho , yeh badhta aur chadhta sood (usury) khana chodh do aur Allah se daro, umeed hai ke falaah paoge.
131. Us aag se bacho jo kafiron ke liye muhaiyya ki gayi hai.
132. Aur Allah aur Rasool ka hukm maan lo, tawaqqu hai ke tumpar reham kiya jayega.
133. Daud kar chalo us raah par jo tumhare Rubb ki bakshish aur us jannat ki taraf jaati hai jiski wusat (vastness) zameen aur asmaano jaisi hai, aur woh un khuda-tars logon ke liye muhaiyaa ki gayi,
134. Jo har haal mein apne maal kharch karte hain khwa badh haal hon ya khush haal , jo gusse ko pee jaate hain aur dusron ke kasoor maaf kardete hain, aise neik log Allah ko bahut pasand hain.
135. Aur jinka haal yeh hai ke agar kabhi koi fahash kaam unse sarzad ho jata hai ya kisi gunaah ka irtikaab karke woh apne upar zulm kar baithte hain to ma’an Allah unhein yaad aa jata hai aur us se woh apne kasooron ki maafi chahte hain, kyunke Allah ke siwa aur kaun hai jo gunaah maaf kar sakta ho aur woh deedha o danista (wilfully persist) apne kiye par israr nahin karte.
136. Aise logon ki jazaa unke Rubb ke paas yeh hai ke woh unko maaf kardega aur aise baaghon mein unhein daakil karega jinke nichey nehrein bethi hongi aur wahan woh hamesha rahenge. Kaisa accha badla hai neik amal karne walon ke liye.
137. Tumse pehle bahut se daur guzar chuke hain, zameen mein chal phir kar dekhlo ke un logon ka kya anjaam hua jinhon ne (Allah ke ehkam o hidayat ko) jhutlaya.
138. Yeh logon ke liye ek saaf aur sareeh tambeeh hai aur jo Allah se darte hon unke liye hidayat aur naseehat.
139. Dil shikasta na ho, gham na karo , tum hi gaalib rahoge agar tum momin ho.
140. Is waqt agar tumhein chot (wound) lagi hai to is se pehle aisi hi chot tumhare mukhalif fareeq ko bhi lag chuki hai. Yeh to zamane ke nasheb o faraaz hain jinhein hum logon ke darmiyan gardish dete rehte hain, tumpar yeh waqt is liye laya gaya ke Allah dekhna chahta tha ke tum mein sacche momin kaun hain, aur un logon ko chant lena chahta tha jo waqayi (raasti ke) gawah hon, kyunke zalim log Allah ko pasand nahin hain.
141. Aur woh is aazmaish ke zariye se momino ko alag chant (purge )kar kafiron ki sarkobi (blot out) kardena chahta tha.
142. Kya tumne yeh samajh rakkha hai ke yunhi jannat mein chale jaaoge halaanke abhi Allah ne yeh to dekha hi nahin ke tum mein kaun woh log hain jo uski raah mein jaanein ladane wale aur uski khatir sabr karne wale hain.
143. Tum to maut ki tamannayein kar rahe thay ! magar yeh us waqt ki baat thi jab maut saamne na aayi thi, lo ab woh tumhare saamne aa gayi aur tumne usey aankhon dekh liya.
144. Muhammad iske siwa kuch nahin ke bas ek Rasool hain, unse pehle aur Rasool bhi guzar chuke hain. Phir kya agar woh marr jayein ya qatal kardiye jayein to tum log ultey paon phir jaaoge? Yaad rakkho! Jo ulta phir gaya woh Allah ka kuch nuksaan na karega, albatta jo Allah ke shukarguzar banday bankar rahenge unhein woh iski jaza dega.
145. Koi zi rooh Allah ke izan ke bagair nahin marr sakta. Maut ka waqt to likha hua hai, jo shaks sawab e duniya ke irade se kaam karega usko hum duniya hi mein se denge, aur jo sawab e aakhirat ke irade se kaam karega woh aakhirat ka sawab payega aur shukar karne walon ko hum unki jaza zaroor ata karenge.
146. Isse pehle kitne hi nabi aise guzar chuke hain jinke saath milkar bahut se khuda paraston ne jung ki, Allah ki raah mein jo museebatein unpar padi unse woh dil shikashta nahin huey, unhon ne kamzori nahin dikhayi, woh (baatil ke aage) sarnagon (abase) nahin huey, aise hi saabiron (steadfast) ko Allah pasand karta hai.
147. Unki dua bas yeh thi ke “aey hamare Rubb! Hamari galatiyon aur kotahiyon se darguzar farma, hamare kaam mein tere hudood se jo kuch tajawuz ho gaya ho usey maaf karde, hamare qadam jamaa de aur kafiron ke muqable mein hamari madad kar.”
148. Aakhir e kaar Allah ne unko duniya ka sawab bhi diya aur is se behtar sawab e aakhirat bhi ata kiya. Allah ko aise hi neik amal log pasand hain.
149. Aey logon jo iman laye ho, agar tum un logon ke isharon par chaloge jinhon ne kufr ki raah ikhtiyar ki hai to woh tumko ulta pher le jayenge aur tum na-murad ho jaaoge.
150. (Unki baatein galat hain) haqeeqat yeh hai ke Allah tumhara haami o madadgaar hai aur woh behtareen madad karne wala hai.
151. Anqareeb woh waqt aane wala hai jab hum munkireen e haqq ke dilon mein roab (terror/darr) bitha denge, is liye ke unhon ne Allah ke saath unko khudayi mein shareek thehraya hai jinke shareek hone par Allah ne koi sanad naazil nahin ki, unka aakhri thikana jahannum hai aur bahut hi buri hai woh qayaam-gaah jo un zalimon ko naseeb hogi.
152. Allah ne (taeed o nusrat ka) jo waada tumse kiya tha woh to usne poora kardiya, ibteda mein uske hukm se tumhi unko qatal kar rahe thay magar jab tumne kamzori dikhayi aur apne kaam mein baham ikhtilaf kiya, aur junhi ke woh cheez Allah ne tumhein dikhayi jiski muhabbat mein tum giraftar thay (yani maal e ganeemat) tum apne sardar ke hukm ki khilaf warzi kar baithe is liye ke tum mein se kuch log duniya ke taalib thay aur kuch aakhirat ki khwahish rakhte thay, tab Allah ne tumhein kafiron ke muqable mein paspan kardiya taa-ke tumhari aazmaish kare aur haqq yeh hai ke Allah ne phir bhi tumhein maaf hi kardiya kyunke momino par Allah badi nazar e inayat rakhta hai.
153. Yaad karo jab tum bhaage chale jaa rahe thay, kisi ki taraf palat kar dekhne tak ka hosh tumhein na tha, aur Rasool tumhare pichey tumko pukar raha tha us waqt tumhari is rawish ka badla Allah ne tumhein yeh diya ke tumko ranjh par ranjh diye taa-ke aainda ke liye tumhein yeh sabaq mile ke jo kuch tumhare haath se jaaye ya jo museebat tumpar naazil ho uspar malul (grieve)na ho, Allah tumhare sab aamaal se bakhabar hai.
154. Is gham ke baad phir Allah ne tum mein se kuch logon par aisi itminaan ki si haalat taari kardi ke woh unghne lage, magar ek dusra giroh jiske liye sari ehmiyat bas apne mafaad (benefit) hi ki thi, Allah ke mutaaliq tarah tarah ke jahilana gumaan karne laga jo sarasar khilaf e haqq thay, yeh log ab kehte hain ke, “ is kaam ke chalane mein hamara bhi koi hissa hai?” Unse kaho, (kisi ka koi hissa nahin) is kaam ke saare ikhtiyaraat Allah ke haath mein hain. “Darasal yeh log apne dilon mein jo baat chupaye huey hain usey tumpar zaahir nahin karte, inka asal matlab yeh hai ke, “agar (qayadat ke) ikhtiyaraat mein hamara kuch hissa hota to yahan hum na maare jaate”. Inse kehdo ke, “agar tum apne gharon mein bhi hote to jin logon ki maut likhi hui thi woh khud apni qatal-gaahon ki taraf nikal aatey”, aur yeh maamla jo pesh aaya, yeh to is liye tha ke jo kuch tumhare seeno mein posheeda(hidden) hai Allah usey aazma le aur jo khot tumhare dilon mein hai usey chaant de. Allah dilon ka haal khoob jaanta hai.
155. Tum mein se jo log muqable ke din peeth pher gaye thay unki is lagzish ka sabab yeh tha ke unki baaz kamzoriyon ki wajah se shaytan ne unke qadam dagmaga diye thay. Allah ne unhein maaf kardiya, Allah bahut darguzar karne wala aur burdbaar (All-Forbearing) hai.
156. Aey logon jo iman laye ho, kafiron ki si baatein na karo jinke azeez o aqarib agar kabhi safar par jaate hain ya jung mein shareek hote hain (aur wahan kisi haadse se do-char ho jaate hain ) to woh kehte hain ke agar woh hamare paas hote to na maare jaate aur na qatal hote. Allah is qisam ki baaton ko unke dilon mein hasrat o andoh ka sabab bana deta hai, warna dar-asal maarne aur jilane wala to Allah hi hai aur tumhari tamaam harakaat par wahi nigraan hai.
157. Agar tum Allah ki raah mein maare jao ya marr jao to Allah ki jo rehmat aur bakshish tumhare hisse mein aayegi woh un saari cheezon se zyada behtar hai jinhein yeh log jamaa karte hain.
158. Aur khwa tum maro ya maare jao bahar-haal tum sabko simat kar jana Allah hi ki taraf hai.
159. (Aey paigambar) yeh Allah ki badi rehmat hai ke tum in logon ke liye bahut narm mijaz waqey huey ho, warna agar kahin tum tundh-khu (rough) aur sangh dil (hard-hearted) hote to yeh sab tumhare gird o pesh se chatt jaate. Inke kasoor maaf kardo, inke haqq mein dua-e-magfirat karo, aur deen ke kaam mein inko bhi shareek e mashwara rakkho. Phir jab tumhara azam (faisla/resolve) kisi rai par mustahkam ho jaaye to Allah par bharosa karo, Allah ko woh log pasand hain jo usi ke bharose par kaam karte hain.
160. Allah tumhari madad par ho to koi taaqat tumpar gaalib aane wali nahin, aur woh tumhein chodh de to iske baad kaun hai jo tumhari madad kar sakta ho? Pas jo sacche momin hain unko Allah hi par bharosa rakhna chahiye.
161. Kisi Nabi ka yeh kaam nahin ho sakta ke woh khayanat kar jaaye aur jo koi khayanat kare to woh apni khayanat sameth qayamat ke roz haazir ho jayega, phir har mutanaffis ko uski kamayi ka poora poora badla mil jayega aur kisi par kuch zulm na hoga.
162. Bhala yeh kaise ho sakta hai ke jo shaks hamesha Allah ki raza par chalne wala ho woh us shaks ke se kaam kare jo Allah ke gazab mein ghir gaya ho, aur jiska aakhri thikana jahannum ho jo badhtareen thikana hai?
163. Allah ke nazdeek dono qisam ke aadmiyon mein badarjaha farq hai aur Allah sabke aamaal par nazar rakhta hai.
164. Dar-haqeeqat ehle iman par to Allah ne yeh bahut bada ehsaan kiya hai ke unke darmiyan khud unhi mein se ek aisa paigambar uthaya jo uski aayaat unhein sunata hai, unki zindagiyon ko sanwaarta hai aur unko kitaab aur danayi (wisdom) ki taleem deta hai, halaanke is se pehle yahi log sareeh gumraahiyon mein padey huey thay.
165. Aur yeh tumhara kya haal hai ke jab tumpar museebat aa padi to tum kehne lage yeh kahan se aayi? Halaanke (jung e Badr mein) is se dugni (double) museebat tumhare haathon [ fareeq e mukhalif (enemies) par] padh chuki hai. (Aey Nabi)! Inse kaho, yeh museebat tumhari apni layi hui hai, Allah har cheez par qaadir hai.
166. Jo nuqsaan ladayi ke din tumhein pahuncha woh Allah ke izan se tha aur is liye tha ke Allah dekhle tum mein se momin kaun hain.
167. Aur munafiq kaun. Woh munafiq ke jab unse kaha gaya, aao Allah ki raah mein jung karo ya kam az kam (apne shehar ki) mudafiyat(defense) hi karo, to kehne lage agar humein ilm hota ke aaj jung hogi to hum zaroor tumhare saath chalte. Yeh baat jab woh keh rahe thay us waqt woh iman ki ba-nisbat kufr se zyada qareeb thay. Woh apni zubaano se woh baatein kehte hain jo unke dilon mein nahin hoti, aur jo kuch woh dilon mein chupate hain Allah usey khoob jaanta hai.
168. Yeh wahi log hain jo khud to baithe rahe aur unke jo bhai-band ladne gaye aur maare gaye unke mutaaliq inhon ne kehdiya ke agar woh hamari baat maan lete to na maare jaate. Inse kaho agar tum apne is qaul mein sacche ho to khud tumhari maut jab aaye usey taal kar dikha dena.
169. Jo log Allah ki raah mein qatal huey hain unhein murda na samjho, woh to haqeeqat mein zinda hain, apne Rubb ke paas rizq paa rahe hain.
170. Jo kuch Allah ne apne fazl se unhein diya hai uspar khush o khurram hain, aur mutmaeen hain ke jo ehle iman unke pichey duniya mein reh gaye hain aur abhi wahan nahin pahunchey hain unke liye bhi kisi khauf aur ranjh ka mauqa nahin hai.
171. Woh Allah ke inam aur uske fazl par shadaan o farhaan hain aur unko maloom ho chuka hai ke Allah momino ke ajar ko zaya nahin karta.
172. Jin logon ne zakhm khane ke baad bhi Allah aur Rasool ki pukar par labbaik kaha(responded) un mein jo ashkhaas neikukar aur parheizgaar hain unke liye bada ajar hai.
173. Aur woh jinse logon ne kaha ke, “ tumhare khilaf badi faujein jamaa hui hain, unse daro”, to yeh sunkar unka iman aur badh gaya (increased) aur unhon ne jawab diya ke hamare liye Allah kafi hai aur wahi behtareen kaarsaaz hai.
174. Aakhir e kaar woh Allah taala ki niyamat aur fazl ke saath palat aaye, unko kisi qisam ka zarar bhi na pahuncha aur Allah ki raza par chalne ka sharaf bhi unhein haasil ho gaya, Allah bada fazl farmane wala hai.
175. Ab tumhein maloom hogaya ke woh dar-asal shaytan tha jo apne doston se khwa-ma-khwa dara raha tha, lihaza aainda tum Insano se na darna, mujhse darna agar tum haqeeqat mein saahib e iman ho.
176. (Aey Paigambar) jo log aaj kufr ki raah mein badi daud dhoop kar rahe hain unki sargarmiyan tumhein azurda na karein (grieve you). Yeh Allah ka kuch bhi na bigaad sakenge. Allah ka irada yeh hai ke unke liye aakhirat mein koi hissa na rakkhey, aur bil aakhir unko sakht saza milne wali hai.
177. Jo log iman ko chodh kar kufr ke kharidaar baney hain woh yaqeenan Allah ka koi nuqsaan nahin kar rahe hain. Unke liye dardnaak azaab tayyar hai.
178. Yeh dheel jo hum unhein diye jaate hain isko yeh kafir apne haqq mein behtari na samjhein. Hum to unhein is liye dheel de rahe hain ke yeh khoob baar-e-gunaah sameit lein, phir unke liye sakht zaleel karne wali saza hai.
179. Allah momino ko is haalat mein hargiz na rehne dega jis mein tum is waqt paye jaate ho. Woh paak logon ko napaak logon se alag karke rahega. Magar Allah ka yeh tareeqa nahin hai ke tumko gaib par muttala karde. Gaib ki baatein batane ke liye to woh apne Rasoolon mein jisko chahta hai muntakhab karleta hai. Lihaza (umoor e gaib ke baare mein) Allah aur uske Rasool par iman rakkho agar tum iman aur khuda tarsi ki rawish par chaloge to tumko bada ajar milega.
180. Jin logon ko Allah ne apne fazl se nawaza hai aur phir woh bukhl (kanjoosi/niggardly) se kaam lete hain woh is khayal mein na rahein ke yeh bakheeli unke liye acchi hai. Nahin, yeh unke haqq mein nihayat buri hai, Jo kuch woh apni kanjoosi se jamaa kar rahe hain wahi qayamat ke roz unke galey ka tauq ban jayega. Zameen aur asmaano ki miras Allah hi ke liye hai aur tum jo kuch karte ho Allah us se bakhabar hai.
181. Allah ne un logon ka qaul suna jo kehte hain ke Allah fakeer hai aur hum gani hain. Unki yeh baatein bhi hum likh lenge, aur is se pehle jo woh paigambaron ko na-haqq qatal karte rahe hain woh bhi unke naam e aamaal mein sabt (recorded) hai (jab faisle ka waqt aayega us waqt) hum unse kahenge ke lo ab azaab e jahannum ka maza chakkho.
182. Yeh tumhare apne haathon ki kamayi hai, Allah apne bandon ke liye zalim nahin hai.
183. Jo log kehte hain “Allah ne humko hidayat kardi hai ke hum kisi ko Rasool tasleem na karein jab tak woh hamare saamne aisi qurbani na kare jise (gaib se aakar) aag kha le”, unse kaho, “ tumhare paas mujhse pehle bahut se Rasool aa chuke hain jo bahut si roshan nishaniyan laye thay aur woh nishani bhi laye thay jiska tum zikr karte ho. Phir agar (iman laane ke liye yeh sharth pesh karne mein) tum sacche ho to un Rasoolon ko tumne kyun qatal kiya?”
184. Ab (aey Muhammad)!Agar yeh log tumhein jhutlate hain to bahut se Rasool tumse pehle jhutlaye jaa chuke hain jo khuli khuli nishaniyan aur sahifey (scriptures) aur roshni bakshne wali kitaabein laye thay.
185. Aakhir e kaar har shaks ko marna hai aur tum sab apne apne poore ajar qayamat ke roz paane wale ho. Kamiyab dar-asal woh hai jo wahan aatish e dozakh se bach jaaye aur jannat mein daakhil kardiya jaaye. Rahi yeh duniya, to yeh mehaz ek zaahir fareb cheez hai.
186. (Musalmaano)! Tumhein maal aur jaan dono ki aazmaishein pesh aakar rahengi, aur tum ehle kitaab aur mushrikeen se bahut se takleef-de baatein sunoge. Agar in sab haalat mein tum sabr aur khuda tarsi ki rawish par qayam raho to yeh badey hausle ka kaam hai.
187. In ehle kitaab ko woh ahad bhi yaad dilao jo Allah ne unse liya tha ke tumhein kitaab ki taleemat ko logon mein phaylana hoga, inhein posheeda rakhna nahin hoga. Magar unhon ne kitaab ko pas-e-pusht (behind their backs) daal diya aur thodi keemat par usey bech daala. Kitna bura kaarobaar hai jo yeh kar rahe hain.
188. Tum un logon ko azaab se mehfooz na samjho jo apne kartooton par khush hain aur chahte hain ke aise kaamon ki tareef unhein haasil ho jo fil waqey unhon ne nahin kiye hain. Haqeeqat mein unke liye dardnaak saza tayyar hai.
189. Zameen aur asmaano ka maalik Allah hai aur uski qudrat sab par haawi hai.
190. Zameen aur asmaano ki paidaish mein aur raat aur din ke bari bari se aane mein un hoshmand logon ke liye bahut nishaniyan hain.
191. Jo uthte, baithte aur latetey, har haal mein khuda ko yaad karte hain aur asmaano zameen ki saakht (creation) mein gaur o fikr karte hain.(Woh be-ikhtiyar bol uthte hain) “ parwardigar! Yeh sab kuch tu ne fizul aur be maqsad nahin banaya hai, tu paak hai is se ke abas (bekar/in vain) kaam kare. Pas aey Rubb! Humein dozakh ke azaab se bacha le .
192. Tu ne jise dozakh mein dala usey dar haqeeqat badi zillat o ruswayi mein daal diya, aur phir aise zalimon ka koi madadgaar na hoga.
193. Maalik! Humne ek pukarne wale ko suna jo iman ki taraf bulata tha aur kehta tha ke apne Rubb ko maano, humne uski dawat qabool karli, pas aey hamare aaqa! Jo kasoor humse huey hain unse darguzar farma. Jo buraiyan hum mein hain unhein door karde aur hamara khaatma neik logon ke saath kar.
194. Khudawanda! Jo wadey tu ne apne Rasoolon ke zariye se kiye hain unko hamare saath poora kar aur qayamat ke din humein ruswayi mein na daal, beshak tu apne wadey ke khilaf karne wala nahin hai”.
195. Jawab mein unke Rubb ne farmaya, “ main tum mein se kisi ka amal zaya karne wala nahin hoon, khwa mard ho ya aurat, tum sab ek dusre ke hum jins ho. Lihaza jin logon ne meri khatir apne watan chodey aur jo meri raah mein apne gharon se nikale gaye aur sataye gaye aur mere liye ladey aur maare gaye unke sab kasoor main maaf kardunga aur unhein aise baaghon mein daakhil karunga jinke nichey nehrein behti hongi. Yeh unki jaza hai Allah ke haan aur behtareen jaza Allah hi ke paas hai”.
196. (Aey Nabi)! Duniya ke mulkon mein khuda ke nafarmaan logon ki chalat phirat tumhein kisi dhoke mein na daale.
197. Yeh mehaz chandh roza zindagi ka thoda sa lutf hai, phir yeh sab jahannum mein jayenge jo badhtareen jaaye qaraar (resting place) hai.
198. Baraks iske jo log apne Rubb se darte huey zindagi basar karte hain unke liye aise baagh hain jinke nichey nehrein behti hain, in baaghon mein woh hamesha rahenge, Allah ki taraf se yeh samaan e ziyafat hai unke liye, aur jo kuch Allah ke paas hai neik logon ke liye wahi sabse behtar hai.
199. Ehle kitaab mein bhi kuch log aise hain jo Allah ko maante hain, us kitaab par iman latey hain jo tumhari taraf bheji gayi hai aur us kitaab par bhi iman rakhte hain jo is se pehle khud unki taraf bheji gayi thi. Allah ke aage jhuke huey hain, aur Allah ki aayaat ko thodi si keemat par bech nahin dete. Inka ajar inke Rubb ke paas hai aur Allah hisaab chukane mein dair nahin lagata.
200. Aey logon jo iman laye ho, Sabr se kaam lo, baatil paraston ke muqable mein pa-mardi dikhao, haqq ki khidmat ke liye kamar-basta ho jao, aur Allah se darte raho, umeed hai ke falaah paoge.